ជនសង្សយ័ ចាន់ ណាវិរះឆៃ ដែលបានធ្វើសកម្មភាពលួចម៉ូតូនៅសង្កាត់ទឹកល្អក់៣ ត្រូវបញ្ជូនទៅតុលាការនៅរសៀលនេះហើយ

ភ្នំពេញ៖ សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានញ្ជូនជនសង្ស័យ ០១នាក់ ទៅតុលាការ ដើម្បីផ្តន្ទាទោស ជាប់ពាក់ព័ន្ធករណីលួចម៉ូតូ នៅរសៀលម៉ោង០២:០០នាទី ថ្ងៃទី១៧ ខែតុលា ឆ្នាំ២០១៨។

តាមរបាយការណ៍របស់សមត្ថកិច្ចបានបញ្ជាក់ថា ជនសង្សយ័មានឈ្មោះ ចាន់ ណាវិរះឆៃ ភេទប្រុស អាយិ ៣២ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌទួលគោក ឃាត់ខ្លួនបន្ទាប់ពីរូបគេបានធ្វើសកម្មភាពលួចយកម៉ូតូ ០១គ្រឿង ម៉ាក ហុងដា សេ១២៥ ពណ៍ខ្មៅ ស្លាកលេខ ភ្នំពេញ 1GQ-1987 ជារបស់ជនរងគ្រោះឈ្មោះ អ៊ុត សុខចាន់ ភេទប្រុស អាយុ ១៨ឆ្នាំ ដែលចតទុកនៅមុខផ្ទះហើយពុំបានដកសោរចេញពីម៉ូតូនោះទេ បន្ទាប់មកជនរងគ្រោះបានដើរចូលក្នុងផ្ទះរបស់ខ្លួនបាត់ទៅ។ លុះប្រហែល០៥នាទីក្រោយមក ស្រាប់តែមានជនសង្ស័យខាងលើ បានឆ្លៀតឱកាស ចូលលួចយកម៉ូតូ របស់ជនរងគ្រោះ ខណៈកំពុងធ្វើសកម្មភាព ត្រូវបានជនរងគ្រោះឃើញបានស្ទុះមកប្រតាយប្រតប់ជាមួយជនសង្ស័យ ហើយស្រែកឆោរឡោលឺដល់សមត្ថកិច្ចអាវុធហត្ថខណ្ឌទួលគោក ដែលកំពុងល្បាតឃើញ បានចុះមកឃាត់ខ្លួនភ្លាមៗតែម្តង។ ករណីនេះកើតឡើងកាលពីថ្ងៃទី១៥ ខែតុលា ឆ្នាំ២០១៨ វេលាម៉ោង០៧:១០នាទីព្រឹក នៅចំណុច មុខផ្ទះលេខ៣១៤ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។

ប្រភពបានបន្តទៀតថា ឆ្លងតាមការសាកសួរ របស់សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ  ជនសង្សយ័ បានសារភាពថា នៅថ្ងៃកើតហេតុ រូបគេ បានទៅយកលុយពីការដាក់បញ្ចាំទូរស័ព្ទនៅម្តុំផ្សារឃ្លាំងរំសេវ តែយកមិនទាន់បានក៏ដើរត្រលប់មកផ្ទះវិញ លុះពេលដើរដល់ចំណុចកើតហេតុខាងលើ បានឃើញម៉ូតូ ០១គ្រឿង ចតទុកមុខផ្ទះដោយពុំឃើញមានម្ចាស់ ហើយមានសោរនៅជាប់និងម៉ូតូផង រូបគេបានឆ្លៀតឱកាស ក៏ធ្វើសកម្មភាលួចតែម្តង តែត្រូវបានម្ចាស់ឃើញទាន់ បានស្ទុះរត់មកចាប់ប្រតាយប្រតប់ជាមួយខ្លួន  នឹងស្រែកឆោរឡោ ដឹងដល់សមត្ថអាវុធហត្ថចុះមកធ្វើការឃាត់ខ្លួនភ្លាមៗតែម្តងទៅ ៕